خالتي عساكر وأبنها جمعة

خالتي عساكر وابنها جمعه

شاب اسم الله عليه في الجامعة

طالع فالح كده من يومه ... وبيتكلم والناس سامعه

بس ده مش الأبن الحيله ... لسه عندها عيل نيله

فقري وفاشل وملوش لازمه 

عنده دماغ تقولش دي جزمه

تعرف اسمه ... اسم علي مسمي 

اسمه سمعه وسمعته لامه

كل عيوب الناس والدنيا

صدق اللي قال البطن قلابه 

تخلف ملك والتاني كتابه

ولادها اتنين متقولش اخوات 

واحد راسي والتاني لاتات 

مطرح ماتيجي مصلحته يبات

طالبوه في الجيش ومعهش شهاده

وخدوه عالآمن ابوستره سوده وبياده

وبقي عسكري  قوي بزياده

وفي يوم ماكان علي الخاطر 

كلم سمعه الخاله عساكر

كيفك يامه والله وحشتيني 

ادعيلي  ده انا طالع عيني

خارجين نفض مظاهره ... عملينها طلبة جامعه

 تصدقي يامه الباشا بتاعنا بيقول لنا دول اعداءنا  

ربنا معاك ياوليدي وابقي اتطمن علي اخوك جمعه

مدام هتروح نواحي الجامعه

وضربو حصار علي باب الجامعه 

ووقف سمعه انتباه  وشدت المظاهره 

وابتدت العساكر بالآمر تتحرك

اضرب ياعسكري ببياده اعداء البلد في زياده

وجمعه في المظاهره بيهتف والعلم في ايده

اللي بيضرب اهله وناسه يبقي خسيس من ساسه لراسه

وامر الباشا هاتولي الواد ده 

جرت العسكر عليه وشدوه وكانت الشده 

ونزل علي رجيله واتسحل مالباب ده للباب ده

شافه سمعه بعنيه وجري علي الباشا يترجاه

ده جمعه اخويا يابيه مالوش في الكلام ده 

ماليش غيره يابيه ووصية الوالده

بص البيه للآتنين وصدر اوامره 

اضرب ياعسكري انا بحمي البلد من امه 

ورفع ايده علي آخوه ينفذ الامر

ونزلت ايده معلمه تقولش دي جمر

وادي اللي خدناه من آولي الامر 

ضرب الواد آخوه وقال بينفذ الامر

  

احلامي

فى طى النسيان أعتدتُ  ان أضع أشيائي
ولكن ليس كل الاشياء تنسي من حياتي

أعتدتُ ان أخطو الي الأحلام بخطِِي واثقةِ
وإن تعثرت خُطايا وكثرُت العثراتِ

أعتدت ان أحلق في سمائي كالطير
ان يرتفع عن الارض بقدميه بسط جناحيه وطار

لم أستسلم  لأبواب مغلقة وإن كان في فتحها كبداً
تسافر عيونى لأحلامي البعيدة ولا تغمض عيناي
دون أحلامها أبدا

ومن الأحلام والأشياء والأحباب نصيب لست فيه
ومدام دون أرادتك فكيف تقتنيه

فلا تحزن علي حلم كنت تظن ان فيه سعادتك
فانت لا تعلم غيب الاشياء ان بدات لك ترُضيكَ

فاصبر فان الصبر يُذيب الجبال وان ملئت نفسُك
بالهموِم الثقال

فى غيبوبة

وخـيالي خدنى من الميــدان ورمـاني ولـقيتني واقــف قــدامه

وجيش وشرطة ضاربين حصار حارسين اسم الله علي مــأمه 

وظـابـط كبير  بيقـول لي امــشي بــلاش تـزعق .. سـاعدتـه نــايم

مــش مــالي عـيـنـك كـل ده .. ولا انت مــابتفهمـش زى البـهـايـم 

وفـضلـت واقف أنـادي وأزعـق وبــعلـو صـوتى يمـكن اشــوفه

أهـــو مـنــى اطــمــــن عـليــــه قــصــــدي اطمن عــلــى وجـــــــــوده  

اطلع ياريس عايـز اقولك كلمتين واوعـى تعـمل مـش سـامعني

ذى نظـامـك اللـى فــات تحــط ايـدك تـحـت ودنـك وتقـولي هــه 

وانت سامع بس عامل مش سامعنى ..

 ويتوه الكلام بيني وبينك بين اه وهه

والا انت مش عايز ترد يمكن في غيبوبه؟  

ولا خلاص مفيش مصلحة بيني وبينك وخلصت السبوبه 

بس هقولك الكلمتين يمكن تفوق وسط الكلام وتسمع حاجه تفيدك 

مع اني عارف اني مش هفيدك  بس هقولهم ومش مهم افيدك 

تصدق ياريس اننا خلعناك ... تصدق قدرنا ومشيناك

تصدق ان بعدك في ميدان للحريات ولو وزارة مشتغلتش يحصل لها تغيرات 

تصدق ان حزبك مات ...  واننا حبسنا البهوات  ... 

وعيالك ياريس مش في المقدمات ماخلاص ياريس نظامك مات 

عقبالك ياريس لما تبقي زي نظامك ... وتبرد نار ام الشهيد ويشعلو نارك

ومش هاخد عزاك سامحني ... ياخدو جارك اللي ع الحدود في انتظارك 

مهو بعد الغاز اللي بلاش يعز قوى مقدارك ... وبس كده

ليس فى الإمكان ابدع من الميدان

دائما ما أرتبط بالأماكن التى ازوراها واتجول في أرجائها ولا تسطيع ذاكرتي ان تتجاهل تلك الأماكن او تمحوها او تترك شئ فيها الا وحفرته في خلاياالعقل والوجدان وحفظته من آفة النسيان ان تصيبة فيظل مثلة مثل أيا من  الأشياء التى تأتى وتذهب عنا بلا عنوان ... انه أبدع مكان ... انه الميدان

عندما تذهب اليه تشم فيه رائحة الحرية و نسيم الديمقراطية الذى ياتى اليه من كل البقاع الساحرة الثائرة فى بلادى ياتى من السويس الباسلة الثائرة عبر العصور ويأتي من  شاطى الاسكندرية المنتفض الجسور  وكل البقاع التي استمدت منه الحريه . فيمتلى صدرك  بنشوة وصفاء وتجد نفسك أبعد مايكون عن الأفعال الدونية . شهوانية كانت او عدوانية فيجعللك مستقيما في نفسك اينما اتجهت الى ركن من اركانة ... أنه سحر الميدان الذي يملئ النفوس ويهذبها
و ترى فيه ايضا من كل أركان بلادى بطلا شامخا يدعوك لكى تثور وترى فيه شيخا في عمر الزهور وترى شابا وقد ولد من شهور فالكل اليوم هناك لا يعرف كم من العمر لديه ... وكيف يعرفون وقد محوا ايام عمرهم المظلمة الظالمة فهم الان من مواليد الميدان .

هنا الميدان الممتلى بالفنون هنا تجد ابناء بلادي المبدعون الحقيقيون  .... تسمع لهم اصواتا مغردة فلا تايأس ان تولد من بينهم ام كلثوم  او يخرج عليك العندليب بصوت عذب ينادى على الأوطان وينشدها او قصيدة ابنودى يسردها
فايزيل عنك كل اوجاع الماضى البائد المهموم .

وكأن دم الشهداء الذى ارتوت به أرض الميدان  نبتت منه الحرية والكرامة والعزة واتى بريح طيبة ووجوة مبتسمة وعلو قامة واخلاق دمثة انه الميدان الذي اصبح أبدع مما كان

المباركون فى الأرض

ونبدأ بإسم الله ونقول كمان وكمان وننادى بأعلي صوتنا على المبَاركُون  في الارض ..، ومش عايز حد يفهم عنوانى غلط بإن الكلام هايدور عن ناس فيها بركة وخير . وميزها ربنا عن باقى الغير  ... لا لا سمح الله مش ده قصدى بل بالعكس
انا قصدي اللى مش سامعين ومش فاهمين ومش عارفين بلدنا رايحة الي فين ... اللي عمرهم ماشافو حاجه عدلة تخليهم يبقو من المباركين ولا حتي شافو رغيف عيش من غير خشب ومسامير ولا شافو أكل حلو مايجيبش المرض الخطير .. ولا عداله تسئل وزير وتنصف غفير ولا تعذيب ولا ترهيب ولا حتي  كلام يطيب خاطرهم ان في تغير ... نفسي اعرف انتو مين
انتو فعلا ولاد بلدي اللي مش لاقيين ولا بلطجيه مأجورين من حزب طره اللعين ... انا فعلا احترت اسأل نفسي عن سبب يخليكو من المباركين .. ده كمان طلع الموضوع مش ولاد بلدي وبس ده كمان الخليجيين اللي قالو عن المبارك انه باع قضية الفلسطنيين واللي قفل المعبر وصدر الغاز للإسرائليين ... وكمان مستعدين يدفعو للمستشفي اللي فيها المسكين بدل الفاتورة فاتورتين دول بقي المباركين من فنانين وسياسين ومذيعات ومذيعين ووزراء عايزين يردو الجميل للي كانو بيه متباركين  مباركة الفاسدين ... بس كده

ماسورة الرياسة

مع كل طلعة شمس رئيس جديد يطلع علينا بافكاره النيره او بسنه اللي عدى وفااات
او بتاريخة المشرف مع نظام بقى من تعداد الأموات .
و ده بقي موضوع كل يوم المتنوع والسريع جدا  (( الترشيح للرياسة ))
وفعلا اسم علي مسمي ترشيح ....
وتحس ان في ماسورة رياسة رشحت على البلد رؤساء
وتلاقي حضره الريس اللي بيطلعلنا في البخت كل كل يوم ده 
مالوش دعوة بقي انه نفع ماينفعش  .... مقبول مش مقبول
هوه مالوش دعوة  سورى قصدي سيادته مالوش دعوة
ولما تساله طب ايه السبب اللي خلي سعادتكم تمن علينا بطلتك البهيه دي
يقوللك والله ان مش لاقي حد لغاية دلوقتي عدل اترشح للرئاسة
و معني كده هوه اللي عدل ومستوي ع الاخر
ومش عارف ليه الوظيفة  دي الوحيده اللي مالهاش مواصفات عندنا
 دا لو الواحد عايز عامل للبوفيه بنحط له  مواصفات كتييير
يعني مثلا لازم يبقي شكله حلو ونضيف ... وبيروح المشوار مايموتش فيه 
ويكون عليه ماسكة صينية عجب فما بالك بقي بالريس ياريس
المهم عشان ماطولش عليكو ان في واحد بس ينفع للشغلانه دى
واعتقد انه لسه الماسورة مرشحتوش علينا ....
بيفكرونى ببنت حلوه وخطابها كتير  وهيه بتحب واحد بس يكون يقدر علي التغير
وياتري مين ولا مين ولا مين اللي هتحبيه ياحبيبتي وتشاوري عليه